സച്ചിന് പ്രായം പതിനാറ്

മുപ്പതുകളുടെ അവസാനത്തിലും സച്ചിൻ തെണ്ടുൽക്കർ എന്ന പ്രതിഭയിൽ പഴയ പതിനാറുകാരന്റെ പ്രതിഭയും പ്രസരിപ്പുമുണ്ടായിരുന്നു. ബ്രിട്ടീഷുകാർ ഇന്ത്യ വിട്ടുപോയിട്ടും, അവർ തന്ന കൊളോണിയൽ കളിരീതികൾ തുടർന്നവരായിരുന്നു അതുവരെയുള്ള ഇന്ത്യൻ കളിക്കാരേറെയും. ആ കൊളോണിയൽ കാലത്തിന്റെ അന്ത്യം കുറിക്കാനെത്തിയ ജീനിയസ് ആയിരുന്നു സച്ചിൻ തെണ്ടുൽക്കർ.

- കെ.എം. നരേന്ദ്രൻ

സച്ചിൻ തെണ്ടുൽക്കർക്ക് പ്രായം പതിനാറാണ്, അന്നും ഇന്നും എന്നും. വികൃതിയും പ്രസരിപ്പുമാണ് ആ പ്രായത്തിന്റെ പ്രത്യേകത. ഇക്കാര്യം ഇന്ന് മറ്റാരേക്കാളും ഓർക്കുന്നത് പാകിസ്താന്റെ ഷോയിബ് അക്തറായിരിക്കും. 2003-ൽ പാകിസ്താനുവേണ്ടി ദക്ഷിണാഫ്രിക്ക യിൽ ലോകകപ്പിനിറങ്ങുമ്പോൾ അക്തർ പന്തെറി ഞ്ഞിരുന്നത് മണിക്കൂറിൽ 150-160 കിലോമീറ്റർ വേഗത്തിൽ ആയിരുന്നു. ലോക ക്രിക്കറ്റ് ചരിത്രത്തിലെ ഏറ്റവും സ്ഫോടനാത്മകമായ വേഗം. ആ ലോകകപ്പിൽ ഇംഗ്ലണ്ടിനെതിരേ അക്തർ 161,3 കിലോമീറ്റർ എന്ന ലോകറെക്കോഡ് വേഗം കൈവരിക്കുകയും ചെയ്തു. അക്കാലത്ത് മിക്ക ഇന്ത്യൻ ബാറ്റ്സ്മാൻമാരും ഫാസ്റ്റ് ബൗളിങ്ങിനെ പേടിച്ചിരുന്നു എന്നതാണ് സത്യം. സെഞ്ചൂറിയനിൽ മാർച്ച് ഒന്നിന് നടന്ന പ്രാഥമിക റൗണ്ട് മത്സരത്തിൽ ഇന്ത്യ പാകിസ്താനെ നേരിട്ടു.

ആദ്യം ബാറ്റ് ചെയ്ത പാകിസ്താൻ 50 ഓവറിൽ ഏഴ് വിക്കറ്റ് നഷ്ടത്തിൽ 273 റൺസ് എടുത്തു. അന്നത്തെ കാലത്ത് അത് ചെറിയ സ്കോറ ല്ല. മാത്രമല്ല, അക്തറും വഖാർ യൂനുസുമാണ് പാകിസ്താനുവേണ്ടി പന്തെറിയുന്നത്. 274 എന്ന ലക്ഷ്യം നേടാനായി, ഇന്ത്യയ്ക്കുവേണ്ടി സച്ചിനും സെവാഗും ഓപ്പണിങ് ബാറ്റ്സ്മാൻമാരായി മൈതാനത്തിറങ്ങി. സാധാരണ ആദ്യപന്ത് നേരിടുന്ന ജോലി സെവാഗിന്റേതാണ്. എന്നാൽ അന്ന് എന്തുകൊണ്ടോ സെവാഗ് സച്ചിനോട് ആദ്യ പന്ത് നേരിടാൻ ആവശ്യപ്പെട്ടു. സച്ചിൻ അത് സമ്മതിക്കുകയും ചെയ്തു. ടീമും രാജ്യവും തന്നിൽ നിന്ന് എന്താണ് പ്രതീക്ഷിക്കുന്നതെന്ന് സച്ചിന് കൃത്യമായി അറിയാമായിരുന്നു. സർവോപരി മുന്നിൽ അക്തറാണ് തീ പറക്കുന്ന പന്തുമായി കാത്തുനിൽക്കുന്നത്. സച്ചിന് ജനനസർട്ടിഫി ക്കറ്റ് പ്രകാരം അപ്പോൾ വയസ്സ് 30. ഏത് ബാറ്റ്സ്മാനും മെയ് വഴക്കം കുറയുന്ന പ്രായം. 30 കഴിഞ്ഞാൽ പരിചയത്തിന്റെ ബലത്തിൽ മാത്രമാണ് അവർ ബാറ്റ് ചെയ്യുക.