ദശാബ്ദങ്ങളുടെ വൈരം

ഏഴ് ദശാബ്ദകാലത്തിന്റെ ആയുസ്സുണ്ട് ഇന്ത്യ - ഓസ്ട്രേലിയ പോരാട്ടത്തിന്. പിൻതിരിഞ്ഞുനോക്കുമ്പോൾ ഒരുപിടി മുഹൂർത്തങ്ങൾ ആ പോരാട്ടചരിത്രത്തിൽ നിറഞ്ഞുനിൽക്കുന്നു സംഭവബഹുലമായ

- വിഷ്ണു രാമകൃഷ്ണൻ

കുഴി കുത്തിയ കഥയെല്ലാം പഴങ്കഥയായി. 16-ാമത് ബോർഡർ - ഗവാസ്കർ  ട്രോഫിയിലെ ആദ്യ രണ്ട് ടെസ്റ്റുകളിൽ ആധികാരിക ജയം നേടി ഇന്ത്യ ട്രോഫി നിലനിർത്തി. 2016 മുതൽ തുടർച്ചയായി നാല് തവണ പരമ്പര വിജയം സ്വന്തമാക്കി ഇന്ത്യ സ്വന്തം മണ്ണിൽ അജയ്യരാണെന്ന് വീണ്ടും തെളിയിച്ചു. ആദ്യ ടെസ്റ്റിൽ ഇന്ത്യൻ സ്പിന്നിർമാരുടെ മുന്നിൽ അനായാസം കീഴടങ്ങിയ ഓസീസ് ബാറ്റർമാർ പക്ഷേ രണ്ടാം ടെസ്റ്റിൽ ആക്രമിച്ച് കളിക്കാനുള്ള പ്രതീതി സൃഷ്ടിച്ചു. തയ്യാറെടുപ്പിലാണെന്ന ട്രാവിസ് ഹെഡ്ഡിന്റെ ബാറ്റിങ് (46 പന്തിൽ 43) അത് വിളിച്ചോതി. പക്ഷേ രണ്ടാം ഇന്നിങ്സിൽ കണ്ണടച്ച് തുറക്കും മുമ്പേ ഫലം മാറി. ജഡേജയുടെയും അശ്വിന്റെയും പന്തുകൾക്കുമുന്നിൽ ഓസീസ് ബാറ്റർമാർ പ്രതിരോധിക്കാൻ പോലും നിൽക്കാതെ അടിയറവ് സമ്മതിച്ചു. രണ്ട് ടെസ്റ്റുകളും മൂന്ന് ദിവസംകൊണ്ട് അവസാനിച്ചതിന്റെ നിരാശ മാത്രം ബാക്കി! ഒരു ടെസ്റ്റ് കൂടി ജയിച്ചാൽ ഇന്ത്യയ്ക്ക് ടെസ്റ്റ് ചാമ്പ്യൻഷിപ്പ് ഫൈനൽ ഉറപ്പിക്കാം. പട്ടികയിൽ ഒന്നാം സ്ഥാനക്കാരായി നിൽക്കുന്ന ഓസ്ട്രേലിയയുടെ കാര്യം തുലാസിലാണ്.

ഇന്ത്യ - ഓസ്ട്രേലിയ ടെസ്റ്റ് പോരാട്ടത്തിന് സ്വാതന്ത്ര്യാനന്തര കാലത്തോളം തന്നെ പഴക്കമുണ്ട്. ആദ്യത്തെ ടെസ്റ്റ് പരമ്പരയ്ക്കായി ഇന്ത്യൻ ടീം ഓസ്ട്രേലിയയിലേക്ക് യാത്രയാകുന്നതിന് രണ്ട് മാസം മുമ്പാണ് ഇന്ത്യയ്ക്ക് സ്വാതന്ത്ര്യം ലഭിക്കുന്നത്. സ്വാതന്ത്ര്യാനന്തരമുള്ള ഇന്ത്യയുടെ ആദ്യ ഓസ്ട്രേലിയൻ പര്യടനമെന്ന സവിശേഷതയും ഈ ടെസ്റ്റ് പരമ്പരയ്ക്കുണ്ടായിരുന്നു. ആഷസ് പരമ്പര പോലെത്തന്നെ കായികലോകത്തെ ഏറ്റവും ആവേശം നിറഞ്ഞ മറ്റൊരു ടെസ്റ്റ് പരമ്പരയാണ് ഇന്ത്യയും ഓസ്ട്രേലിയയും തമ്മിലേത്. ഇത്തവണത്തെ പരമ്പരയ്ക്ക് മുന്നോടിയായി ഓസീസ് ക്യാപ്റ്റൻ പാറ്റ് കമ്മിൻസ് പത്രസമ്മേളനത്തിൽ പരമ്പരയെപ്പറ്റി പറഞ്ഞതിങ്ങനെ : “ഇന്ത്യയിൽ ഒരു ടെസ്റ്റ് മത്സരം ജയിക്കുക കഠിനമാണ്. ഇവിടെ പരമ്പര ജയിക്കാൻ സാധിച്ചാൽ അത് ആഷസിനേക്കാൾ വലുതായിരിക്കും. ഇന്ത്യ ഓസ്ട്രേലിയ പോരാട്ടങ്ങളുടെ ചരിത്രത്താളുകൾ നിവർത്തിയാൽ അതിന്റെ വക്കിൽ അതുല്യമായ കണക്കുകളും അളവറ്റ കണ്ണീരും പറ്റിയിരിക്കുന്നത് കാണാം.

പരാജയങ്ങളുടെ ആദ്യകാലം